Bann lavansman, bann lide nouvo, bann lide ki vremem sanz nou leker profondeman, sanz nou bann manier panse ek, kouma konsekans sanz nou bann striktir ek nou bann sistem, sa bann lide-la, dapre tou lozik nepli vinn depi nou: zot kapav sorti inikman depi bann seki pli defavorize, bann seki an deor seki nou kone, bann seki exkli, bann karmond.
Zis zot ki ena enn regar konple ek orizinal lor seki pa pe fonksionn kouma bizin dan nou lavi ek dan nou bann kominote. Zot tousel ki pe sarye tou bann lespwar, tou bann intwision sosial ek politik ki kapav gid nou ver enn nouvo sosiete.
Zis seki viv dan nwarte ki konn sinifikasion lalimier. Zis seki zot drwa pann respekte ki konn sinifikasion lazistis ek konkretizasion bann drwa imin.
Sa laswaf ki nou tou ena pou enn vre sanzman la, nou dezir ki bann ki pli pov kapav dibout ek pran zot destin dan zot lame, pa pou satisfe avek kreasion bann meyer servis, par bann amandman lalwa, par invansion enn nouvo stil lozman ou lansegnman skoler…
Tousa la neseser, normal, me li pa pou servi nanye, si nou pa investi dan bann site kot ena irzans ek dan bann lozman sosial, si nou pa zwenn bann abitan, pou ekout zot, pou swiv zot lide.
Mo pe pans a sa boug-la, ki ti dir mwa: “mwa, mo kone ki savedir lafin, mo ena boukou pou dir lor la, me zame inn demann mwa koze. Kan mo koz lor lafin zot donn mwa bann kontribision.”
Si nou pa konstrir bann relasion nouvo avek zot, bann relasion ki pou permet zot kwar dan nou, dan nou lamitie, ek nou solidarite, demokrasi pa pou progrese.
Zot bizin rasire ki lasosiete bizin zot pou vinn pli imin ek pli fraternel: akoz sa ki nou bizin rezwenn zot ek lager pou ki zot kapav asim zot rol revelater lazistis.