Ry namana malala,
Mijery ireo fianakaviana eny amin’ny tanan_dehibe tsizarizary ianareo, miezaka ianareo ny hahalala azy ireo, ny hamantatra ny handraisany ny fihetsika ara-pirahalahiana ataonareo, ny fiheverany manoloana ny fiainana, ny hahalala ny fomba fiainany. Ary matetika, dia very hevitra ianareo.
Izahay kosa etsy an-daniny dia efa nanandrana ny hanampy anareo hahalala azy ireo; ka efa nikarakara fifanakalozan-kevitra telo izahay, teo amin’ny sehatra iraisam-pirenena, namondronana manampahaizana avy amin’ny firenena folo samihafa. Niezaka ny hankany amin’ny ati-fanahy, ny saina ary ny fo, mihoatra ny zavatra hita sy ny tantarakely ny gazety kelinay . Nanokatra toerana fampirantiana izahay tamin’ireny tsenabe ireny mba hanairana ny feon’ny fieritreretana sy hampahafantarana ny fianakaviana monina eny amin’ireny tanan-dehibe tsizarizary ireny.
Maro no tsy mahatakatra io fitia te hanoro, te hampahafantatra, te-hanazava io. Misy olona sasany mihevitra fa tokony manampy, mamonjy , manavotra amin’izay ilainy, mampahery ireo fianakaviana eny amin’ny tanandehibe tsizarizary fotsiny izahay dia ampy. Marina ny voalazan’izy ireo mihiaka aminay manao hoe : « Ianareo tsy mataho-maty ireo, tandremo tsy ho lasa mpampiseho fahaizana mikasika ny fahantrana lalina fotsiny ianareo ka lasa mety tsy hisy vokany akory”… Misaotra azy ireo isika, satria manampy antsika izy ireo tsy hivoana amin’io fifandraisana amin’ny olombelona io amin’ny alalan’ny fiarahana, fihainoana, fiombonana ary fanampiana sarotsaro-pady.
Izao koa anefa, ahoana no atao hiarahantsika amin’izy ireo raha andosirantsika ny fomba fiainana any amin’ireo tanan-dehibe tsizarizary, hihaino kanefa tsy mahazo ny hevitry ny teny, manampy kanefa tsy mahafantatra izay ilaina? Moa ve tsy ho sanatria isika ho zary hanaiky tsy fidiny sy ho mpizara anjara tsy araka ny maha-olombelona?
Mifameno ireo toe-tsaina roa tonta ireo, sady tsy mifanameloka no tsy mifanilika: Mitia mba hahalala sy mahalala mba hitia no fototry ny fifanatonana ara-pirahalahiana rehetra.