Tany am-piandohan’ny taona 1987, nandritra ny fivoriana niarahana tamin’ireo mpilatsaka an-tsitrapo tao amin’ny Ivotoerana Iraisam-pirenenan’ny Fikambanana tao Méry-sur-Oise, no nizaran’i Mompera Joseph Wresinski ny fanantenany ny amin’io taona io izay nanamarika ny faha-30 taonan’ny Fikambanana. Ity lahatsoratra ity, nivoaka tao amin’ny Tahirinkevitr’i Pierrelaye, tamin’ny volana Janoary-Martsa 1987, no namerina ny zavatra nolazainy. Eto am-piomanantsika ny Andro manerantany ho an’ny fandavana ny fahantrana lalina , dia handeha hovakiana indray ny voalazany mikasika ny dikan’io andro fahatsiarovana ireo olona nijaly noho ny fahantrana lalina ho avy io na dia mbola tsy voafaritra aza ny datin’ny 17 Oktobra tamin’izany, sy ireo “fotoana telo” ho raiketina ao anatiny.
Marina fa ho antsika dia taona ho an’ny daholobe ny taona 1987, miaraka amin’ireo hetsika rehetra hanamarihana ny faha-30 taonan’ny Firohotana. Tsy manakana azy ho taonan’ny fandinihana koa anefa izany.
Tsy azo ialàna mihitsy ary izany raha tiantsika ny hanome fototra mafy orina sy dikany manokana ho an’ny faha-telopolo taonan’ny Firohotana.
Ity taona ity ho antsika dia tsy maintsy ho taona ahafahantsika miverina indray mahafantatra ireo fianakaviana sy ny andraikitsika amin’izy ireo (…) Nandritra izay telopolo taona, nihaonantsika tamin’ireo fianakaviana niaina tao anatin’ny fahantrana lalina ireo, dia nanandrana isika ny namaly tamin’ny fomba nifanaraka indrindra tamin’ ny toe-javatra niainan’izy ireo : tamin’ny fananganana sehatr’asa Fahazazana voalohany ho an’ny ankizy kely indrindra sy ny renin’izy ireo, sehatr’asa ho an’ny ankizy, sehatr’asa ho an’ny tanora… Kanefa na inona na inona sehatr’asa nataontsika, dia ilaintsika foana ny maneho, mampahafantatra ny fianakaviana sahirana rehetra. Nihevitra isika fa ny sehatr’asa manokana rehetra izay natao dia nahakasika sy tsy maintsy nanetsika ny fianakaviana iray manontolo. (…)
Amin’ny alalan’ireo sehatra’asantsika ireo isika no vavolombelon’ireo mponina, vavolombelon’ny fahafahany manao zavatra, vavolombelona fa afaka miditra ao amin’ny fiaraha-monina izy ireo. Mba hahatratrarana izany, dia tsy maintsy mbola manamafy hatrany isika ny fahalalana entitra ny fiaraha-monina izay efa iainan’ireo fianakaviana ireo sy izay mbola hiainany, miaraka amin’ireo tolotra azony homena azy ireo , sy ireo zava-dratsy homaniny ho an’izy ireo koa. . Tompon’andraikitra amin’ny mponina iray isika, amin’ny hoaviny. (…)
Io fahalalana nohamafisina io, io sehatr’asa mazava tsara io no tohana sy zezika ho an’ity tsingerintaona ity. Ho an’ity fotoana ity, eo amin’ny lafiny ho an’ny daholobe, ny Firohotana iraisam-pirenena dia hifantoka amin’ny sori-dalana telo matotra tsara :
– ny fanombohana ny fanentanana manodidina ny tatitra “Fahantrana lalina sy ny fahantrana ara-toekarena sy ara-tsosialy,” izay hatolotra ny Filankevitra ara-toekarena sy ara-tsosialy amin’ny volana Febroary;
– ny fihaonambe any Amerika Atsimo karakarain’ny Vondrona maharitra momba ny Fahantrana faraidiny manerantany atao amin’ny volana Jona;
ary
– ny andro fahatsiarovana ireo olona rehetra nijaly tamin’ny fanitsakitsahana ny zon’olombelona, izay hotanterahina amin’ny fizarana telo:
- Ny fotoam-bavaka ara-pinoana , izay tokony hatao ao amin’ny Katedralin’i Notre-Dame de Paris;
- Ny fotoanan’ny « vavaka tsy miankina amin’ny finoana »: ny fahatsiarovana izay antenaintsika handraisan’ ireo nahazo ny loka Nobel, ireo olo-malaza misehatra amin’ny Zon’olombelona, ary angamba ny Filohan’ny Repoblika Frantsay.
Ireo rehetra ireo, dia antenaina fa ho lasa fomba amam-panao ao anatin’ny Firohotana ity andro fahatsiarovana ity. Iza no mahalala ? ampiarahina amin’ny faharetana be dia be sy diplaomasia ve, tsy ho lasa androm-pirenena any amin’ny firenena maro ?
- Fotoanan’ny fetim-bahoaka, ny hariva, ao amin’ny Kianjan’ny fanatanjahan-tena ao Bercy, ao Paris, eo anatrehan’ny manampahefana ara-politika maro..
Izay raha fintinina, ny rafitra hanohanana ity tsingerintaona ity. (…) Raha afaka manangona ny herintsika isika fa tsy manaparitaka azy, dia ho afaka hanao izay telopolo taona izay ho fotoana ahafahantsika manamafy ny maha-izy antsika.