Lasa any amin’ireo fianakaviana nongotana tamin’ny tanànany, any atsimon’i Sahara ny eritreritro. Ny fahantrana lalina no nanosika azy ireo hanjohy ny lalankely, ny « sampanana maro », ny lalana vita tara. Mitoby eny amin’ny sisin’ny tanàn-dehibe izy ireo avy eo, tsy misy fomba ahafahany miorina eo anefa. Tsy afaka manatanteraka intsony ny andraikiny sy ny zony araka ny fomba amam-panaony izy ireo raha oharina amin’ ny fivelomany arak’ asa, raha oharina amin’ ny fiarovana ny ankizy amin’ny trano honenana sy fanabeazana azy ireo ara-pomban-drazana. Ny fianakaviana tsy afaka intsony mamerina indray ny fiainany ara-tsosialy sy ara-piarahamonina dia tsy vitan’ny hoe mahantra fotsiny ihany. Teo ao anatin’ny fahantrana faraidiny izy ireo izay mametraka azy any ivelan’ny fandaharan’asa fampandrosoana rehetra. Rehefa tonga any amin’ny sisiny izay nametrahan’izy ireo ny toeram-pialofany vonjimaika indray ny fanitarana ny tanàn-dehibe dia tsy maintsy miala eo izy ireo. Satria ,izy ireo tsy afaka mitana intsony na andraikitra na zo , dia osa loatra ny handray ireo fitaovam-pampivoarana ny tanàna izay atolotra . Tsy handray anjara amin’ny fanovàna, na amin’ny tombontsoa vaovao azo avy amin’izany koa izy ireo.
Lasa any amin’ireo lehilahy, vehivavy ary tanora iharan’ny tsy fananan’asa maharitra any amin’ny firenena mandroso koa ny eritreritro. Rehefa tsy misy fahaizana na tahiry ara-batana sy ara-tsosialy azo raisina , dia miafara any amin’ny sokajin’olona mila ampiana fotsiny . Ratsy trano fonenana ny fianakavian’izy ireo ; tsy afaka manohana ny fianaran-janany. Raha ny marina dia tsy misy fandaharan’asa fanofanana arak’asa na dia iray aza tena mahatratra azy ireo eny amin’ny tsenan’asa ho an’ny ampitso. Any amin’ny tany mandroso, dia tsy afaka manatanteraka ny andraikitra maha-ray aman-dreny azy koa ireo tena mahantra, toy izany koa ny zony amin’ny maha-mpiasa na amin’ny maha- olom-pirenena azy . Tsy manana toerana na inona na inona koa izy ireo , afa-tsy ny ho sokajin’ny olona mila ampiana fotsiny, ao anatin’ ny fiarahamonin’ny kajy mirindra sy ny fifandraisana.
Lasa any amin’ireo ankizy, ireo tanora miaina ao anatin’ny fahantrana lalina eny an-dalambe any amin’ny tanàna sasany any Amerika Latina ihany koa ny eritreritro. Tsy manana anjara amin’ny fiainam-pianakaviana izy ireo, na ara-paharazana izany na an-dalam-piovana. Tsy mahazo fanabeazana ara- kolotsaina sy ara-fandraisan’andraikitra amin’ny ho avy, izay raha ny tokony ho izy omen’ny fianakaviana, ny manodidina ary ny vondrona sosialy misy azy. Noho izany, manerana an’izao tontolo izao, dia misy olona, fianakaviana ary vondrom-piaraha-monina ao anatin’ny toe-pahantrana tanteraka tsy afaka mandray andraikitra na inona na inona amin’ny fiainana sy ny fiovana ara-tsosialy, ara-toe-karena, ara-kolontsaina ary ara- politika ao amin’ny fireneny. Ireo izay tsy mandray anjara amin’izany anefa dia tsy mahazo tombony koa na zo vaovao, any am-parany. Ny fandrosoana ara-tsosialy sy ara-toekarena izay andraisan’ny hafa anjara dia tsy manapaka ny faribolana maloto izay mitazona azy ireo ho voahidy.
Eto mihitsy no mipetraka ny fanambin’ny Zon’Olombelona. Amin’ny toe-javatra manao ahoana no ahafahan’ireo fianakaviana sy vahoaka ireo ho tompon’andraikitra amin’ny tenany, amin’ny tokantranony, ho tompon’andraikitra miaraka amin’ny ho avin’ny fianakaviambem-pirenena sy iraisam-pirenena araka ny tokony ho izy?
Ho afaka hanao izany izy ireo , raha toa isika mandroso amin’ny faniavana te- hitambatra – mihoatra izay rehetra mety hampisaraka antsika sady eo koa – ny tanantsika, ny fontsika ary ny saintsika mankany amin’ny fanompoana ireo ankizy sy fianakaviana izay tena tavela hatreto.
Ho afaka hanao izany izy ireo, raha toa isika mihevitra azy ireo ho olona sy fianakaviana tamin’ny androny, izay manana traikefa amin’izao faran’ny taonjato faha-20 izao, izay tena tsy maintsy ampitain’izy ireo amintsika.
Ho afaka hanao izany izy ireo, raha toa isika manaiky koa fa mpitondra ny hevitry ny fiaraha-monina ankehitriny sy ny mpiara-belona aminy izy ireo.
Ho afaka hanao izany izy ireo, raha toa isika mandray ho zava-dehibe ny faniriany hanorina hoavy ho an’ny zanany sy ho an’ny ankizy rehetra izay hiditra amin’ny taonjato faha-21.
Noho izany, amin’izay fepetra izay, dia hampianatra antsika ny fahalalana tena ilaina izy ireo, ny fahalalany momba ny maha-manerantany sy ny maha-tsy azo sarahina ny Zon’olombelona.